Бақайдгирӣ все шаблоны для dle на сайте newtemplates.ru скачать
 
  • 13:03 – Президенти Тоҷикистон Эмомалӣ Раҳмон: «Тайи 25 соли охир беш аз 80 лоиҳаи давлатии сармоягузорӣ барои бунёди инфрасохтори зарурӣ дар ҳаҷми беш аз 42 миллиард сомонӣ амалӣ гардид» 
  • 11:56 – Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати ҷашни Меҳргон 
  • 09:41 – Иштироки Пешвои миллат Эмомалӣ Раҳмон дар Ҷаласаи Шӯрои сарони давлатҳои аъзои Иттиҳоди Давлатҳои Мустақил 
  • 09:38 – САММИТИ ИДМ ДАР АШҚОБОД. МУЛОҚОТ ДАР ҲАЙАТИ МАҲДУД ОҒОЗ ГАРДИД: иттилоъ дода мешавад, ки сарони давлатҳо дар ин шакли ҳамоиш масъалаҳои муҳимро баррасӣ менамоянд 

САРВАРИ ДАВЛАТ ЭМОМАЛӢ РАҲМОН АЗ НАМОИШИ ҲУНАРҲОИ МАРДУМӢ ВА ТАОМҲОИ МИЛЛӢ ДАР НОҲИЯИ РӮДАКӢ БОЗДИД НАМУДАНД

САРВАРИ ДАВЛАТ ЭМОМАЛӢ РАҲМОН АЗ НАМОИШИ ҲУНАРҲОИ МАРДУМӢ ВА ТАОМҲОИ МИЛЛӢ ДАР НОҲИЯИ РӮДАКӢ БОЗДИД НАМУДАНД

САРВАРИ ДАВЛАТ ЭМОМАЛӢ РАҲМОН АЗ НАМОИШИ ҲУНАРҲОИ МАРДУМӢ ВА ТАОМҲОИ МИЛЛӢ ДАР НОҲИЯИ РӮДАКӢ БОЗДИД НАМУДАНД
25 сентябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз намоиши маҳсулоти нонию қаннодӣ ва таомҳои милливу ҳунарҳои мардумӣ дар ноҳияи Рӯдакӣ боздид намуданд.
Аҳли заҳмати 16 шаҳраку деҳоти ноҳия маҳсули дастранҷи худро ба маъраз гузоштанд.
Нахуст Сарвари давлат муҳтарам Эмомалӣ Раҳмон бо ҳунару маҳорати баланди нонпазии кадбонувони ноҳия шинос шуданд. Сокинони шукргузори ноҳияи Рӯдакӣ дар ҳама бахшу соҳаҳо бо заҳмати аҳлона ба дастоварду натиҷаҳои назарраси меҳнатӣ ноил мегарданд.
Дар гӯшаи дигари намоишгоҳ дар дегҳои алоҳида пухтани таҳмол, далда, ду намуд ҳалво, оши палав ва дигар намуди ғизоҳои болаззат муаррифӣ гардид. Таомҳои миллии мо дар олам бо таъму лаззати ба худ хос беҳамто буда, шаҳодати соҳибтамаддун будани тоҷикон аст.
Ҳунармандони чирадасту хушсалиқаи ноҳия аз эълон гардидани Солҳои рушди деҳот, сайёҳӣ ва ҳунарҳои мардумӣ илҳоми тоза гирифта, ба эҳё ва рушди ҳунарҳои халқӣ, аз қабили кулолгарӣ, кандакорӣ, табақтарошӣ, оҳангарӣ, сабадбофӣ, ҷомадӯзӣ, кашидадӯзӣ, либосҳои миллӣ ва амсоли ин камари ҳиммат бастаанд. Рушди соҳаи сайёҳӣ дар мамлакат ва таваҷҷуҳи бештари сайёҳони хориҷӣ ба давлати мо ҳунармандони чирадасти ноҳияро водор кардааст, ки барои сайёҳон армуғонҳои зебову дилкаш омода созанд.
Дар маҷмуъ, дар намоиши маҳсулоти нонӣ таомҳои миллӣ, қаннодӣ ва ҳунарҳои мардумӣ маҳсули дастранҷи ҳунармандони бомаҳорати ноҳияи Рӯдакӣ, ки бо завқу салиқаи баланд офарида шудаанд, ба таври шоиста муаррифӣ карда шуд.
Таъкид гардид, ки маҳз дар замони ҷаҳонишавӣ эҳё ва рушди анъанаҳои миллӣ, ҳунарҳои мардумӣ ва ҳифзи арзишҳои бойи ниёгон метавонад миллати соҳибтамаддуну соҳибфарҳанг ва дорои таърихи куҳанро пойдору устувор нигоҳ дорад.
Пешвои муаззами миллат муҳтарам Эмомалӣ Раҳмон ба ҳунару маҳорати баланди аҳли заҳмати ноҳия баҳои баланд дода, ҷиҳати эҳё ва рушди ҳунарҳои мардумӣ ва муаррифии арзандаи он дар арсаи байналмилалӣ ба сокинон ҳидоятҳои судманд доданд.


ПРЕЗИДЕНТИ МАМЛАКАТ ЭМОМАЛӢ РАҲМОН МУАССИСАИ ТАҲСИЛОТИ МИЁНАИ УМУМИИ РАҚАМИ 182-РО ДАР ДЕҲОТИ ЧОРТЕППАИ НОҲИЯИ РӮДАКӢ ИФТИТОҲ НАМУДАНД
Пас аз шиносоӣ бо ҳунарҳои мардумӣ ва таомҳои миллии аҳли заҳмати ноҳияи Рӯдакӣ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Муассисаи таҳсилоти миёнаи умумии рақами 182-ро, ки дар деҳаи Ҷӯйбодоми деҳоти Чортеппаи ноҳия бунёд гардидааст, ифтитоҳ намуданд.
Дар саҳни муассисаи навбунёди таълимӣ Пешвои муаззами миллат муҳтарам Эмомалӣ Раҳмонро хонандагону омӯзгорони ин боргоҳи илму маърифат гарму самимӣ истиқбол гирифтанд.
Мавриди зикр аст, ки муассисаи нави таълимӣ дар заминаи таваҷҷуҳи хоса ва ғамхориҳои ҳамешагии Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи маориф ва фароҳам овардани шароити арзандаи таълим барои насли наврасу ҷавони мамлакат, бо фармоиши Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон аз тарафи Корхонаи воҳиди давлатии таъмиру сохтмони Дастгоҳи иҷроияи Президенти Ҷумҳурии Тоҷикистон бо тарҳи муосир ва ҷавобгӯ ба меъёрҳои байналмилалӣ сохта шудааст.
Мактаб аз се ошёна иборат буда, барои 1280 ҷойи нишаст дар ду баст бунёд гардидааст. Муассисаи таълимӣ аз 28 синфхонаи барҳаво, аз ҷумла, 4 кабинети фаннӣ: химия, физика, математика, биология, 4 синфхонаи таълими меҳнат дар алоҳидагӣ барои писарон ва духтарон, 2 синфхонаи компютерӣ, китобхона бо ду утоқи алоҳидаи китобхонӣ ва 18 ҳуҷраи ёрирасон иборат мебошад.
Пешвои миллат муҳтарам Эмомалӣ Раҳмон ба сатҳу сифати корҳои сохтмонӣ дар муассиса баҳои баланд дода, аз фароҳам шудани шароити арзандаи таълим ба масъулон ва омӯзгорон ҷиҳати тарбияи дурусти насли ояндаи миллат ва дар рӯҳияи баланди ифтихори миллӣ ба воя расидани онҳо дастуру супоришҳои мушаххас доданд.
Дар ошёнаи якуми бинои муассиса ошхона мавҷуд аст, ки барои 150 ҷойи нишаст пешбинӣ гардидааст ва дар он барои хонандагон хӯрокҳои гарму болаззат пешниҳод мегардад. Барои тарғибу ташвиқи тарзи ҳаёти солим ва ба варзиш ҷалб намудани насли наврасу ҷавон дар муассисаи таълимӣ толори барҳавову муосири варзишӣ сохта шудааст, ки 240 ҷойи нишаст барои тамошобинон дорад.
Толори варзишӣ асосан барои баргузор намудани бозиҳои футболи хурд, волейбол ва баскетбол пешбинӣ гардидааст. Дар толори мазкур хонандагон имкон доранд дар рафти машғулиятҳои варзишӣ ба обу тоби бадан машғул шаванд.
Бо мақсади дар шароити зарурӣ баргузор намудани ҷамъомаду чорабиниҳои гуногуни оммавию фарҳангӣ дар муассисаи навбунёди таълимӣ толори барҳавои маҷлисгоҳ бо 185 ҷойи нишаст мавҷуд аст, ки он бо дастгоҳу таҷҳизоти зарурӣ муҷаҳҳаз мебошад.
Аснои шиносоӣ ба Сарвари давлат муҳтарам Эмомалӣ Раҳмон иттилоъ дода шуд, ки бо мақсади таъмини гармӣ дар фасли сармо тамоми синфхонаҳо, роҳраву ҳуҷраҳои ёрирасон ва утоқҳои кории муассиса бо шабакаи мутамаркази гармидиҳӣ муҷаҳҳаз мебошад.
Барои зебою назаррабо гардидан саҳн ва атрофи муассисаи таълимӣ майсазор карда шуда, дарахтони ҳамешасабз шинонида шудаанд, ки бо низоми муосири обёрӣ таъмин мебошанд.
Иншооти дигари ёрирасони муассиса шабакаи обрасонист, ки аз қаъри 80 метр об кашида шуда, ба муассиса интиқол дода мешавад. Барои таъмини бехатарӣ ва мушоҳидаи пайвастаи раванди таълим дар дохил ва беруни бинои таълимӣ 20 адад камераи назоратӣ насб гардидааст.
Дар саҳни муассисаи таълимӣ Сарвари давлат муҳтарам Эмомалӣ Раҳмон дар мулоқот бо омӯзгорону хонандагон аз шароити муҳайёгардида ба омӯзгорону хонандагон дар самти истифодаи босамари имконияти фароҳамшуда, аз худ кардани барномаҳои таълимӣ, кор бо техникаю технологияи муосир ва омӯзиши забонҳои хориҷӣ ҳидоятҳои судманд доданд.

ПЕШВОИ МИЛЛАТ ЭМОМАЛӢ РАҲМОН МУАССИСАИ ТАҲСИЛОТИ МИЁНАИ УМУМИИ РАҚАМИ 85-РО ДАР НОҲИЯИ РӮДАКӢ МАВРИДИ ИСТИФОДА ҚАРОР ДОДАНД
25 сентябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ дар ноҳияи Рӯдакӣ, дар деҳаи «Оли Сомон»-и деҳоти “Зайнабобод” Муассисаи таҳсилоти миёнаи умумии рақами 85-ро мавриди истифода қарор доданд.
Иттилоъ дода шуд, ки муассисаи мазкур бо дарназардошти талаботи муосири сохтмонӣ бунёд шуда, дорои 640 ҷойи нишаст дар ду баст мебошад.
Аснои шиносоӣ ба Сарвари давлат муҳтарам Эмомалӣ Раҳмон иттилоъ доданд, ки муассисаи мазкур аз ҷониби соҳибкори ватанӣ Абдуҷаббор Қурбонов давоми як сол бо тарҳи зебову замонавӣ бунёд шуда, аз се ошёна иборат мебошад. Муассисаи таълимӣ дар як қисми заминҳои Муассисаи таҳсилоти миёнаи умумии рақами 85, ки соли 1963 сохта шуда буд, бунёд гардидааст.
Дар мактаб барои таълиму тарбияи насли ояндасози ҷумҳурӣ беҳтарин шароит муҳайё карда шудааст. Тавре ба Пешвои муаззами миллат муҳтарам Эмомалӣ Раҳмон иттилоъ доданд, ин мактаби шакли нав бо мақсади дар сатҳи баланд ба роҳ мондани таҳсилот, 13 синфхона, аз ҷумла синфхонаҳои забони русӣ, англисӣ, забон ва адабиёти тоҷик, физика, биология, математика, химия ва технологияи иттилоотӣ бо таҷҳизоти зарурии таълим муҷаҳҳаз гардонида шудааст. Бо мавриди баҳрабардорӣ қарор гирифтани мактаби мазкур ва имкониятҳои хуби таълимии он, ҳайати 25-нафараи омӯзгорони ин муассисаи таълимӣ имкон пайдо мекунанд, ки сифати таҳсилотро баланд бардошта, хонандагонро аз илмҳои замонавӣ бархӯрдор намоянд.
Зимни боздид Пешвои муаззами миллат муҳтарам Эмомалӣ Раҳмон ба сифати корҳои сохтмонӣ баҳои баланд дода, иқдоми созандаи соҳибкори маҳаллиро шоёни таҳсин хонданд. Инчунин ифтитоҳи ин муассисаи таълимиро Сарвари давлат беҳтарин туҳфа ба хонандагон ва омӯзгорони ноҳияи Рӯдакӣ арзёбӣ карда, вобаста ба ин аз кормандони соҳаи маорифи ноҳия даъват ба амал оварданд, ки бо пуштибонӣ аз сиёсати маорифпарваронаи давлату Ҳукумати Ҷумҳурии Тоҷикистон дар тарбияи кӯдакону наврасон ва ҷавонон саҳми арзанда гузоранд. Чунки пешрафти давлатдории миллӣ аз рушди соҳаи маориф вобастагии амиқ дорад.
Ба маълумоти масъулин, марҳилаи дуюми сохтмони Муассисаи таҳсилоти миёнаи умумии рақами 85 дар ноҳияи Рӯдакӣ дар ояндаи наздик шурӯъ мешавад. Тибқи лоиҳа, дар иншооти бунёдшаванда маҷлисгоҳ, толори варзишӣ, ошхона ва дигар иншооти ёрирасон ба истифода дода хоҳанд шуд.




ПРЕЗИДЕНТИ МАМЛАКАТ ЭМОМАЛӢ РАҲМОН КОРХОНАИ ҶДММ «ОҲАНГУДОЗИИ ТОҶИКИСТОН»-РО ДАР НОҲИЯИ РӮДАКӢ ИФТИТОҲ НАМУДАНД
25 сентябр Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ дар ноҳияи Рӯдакӣ дар деҳоти Чоргултеппа ба фаъолияти корхонаи «Оҳангудозии Тоҷикистон» оғози расмӣ бахшиданд.
Ҷамъияти дорои масъулияти маҳдуди «Оҳангудозии Тоҷикистон» бо иқдомҳои созандаи Пешвои миллат ҷиҳати татбиқи бомароми ҳадафи чоруми миллӣ саноатикунонии босуръати мамлакат, истеҳсоли маҳсулоти босифати ватанӣ ва ба роҳ мондани содироти он ба хориҷи мамлакат, таъсиси ҷойҳои нави корӣ ва бо ин васила беҳтар намудани сатҳи зиндагии аҳолӣ бунёд шуда, аз ҷиҳати иқтидори истеҳсолӣ калонтарин корхона дар ҳудуди ноҳия ба ҳисоб меравад.
Зимни муаррифӣ ба Сарвари давлат муҳтарам Эмомалӣ Раҳмон иттилоъ дода шуд, ки самти асосии фаъолияти корхонаи навтаъсис коркарди оҳанпора ва истеҳсоли ду намуди масолеҳи сохтмонӣ – арматур ва ноқил бо андозаҳои гуногун мебошад. Барои идора намудани дастгоҳу технологияи замонавӣ ва банду басти маҳсулоти истеҳсолшуда 150 нафар мутахассиси маҳаллӣ ба кори доимӣ ҷалб карда шудаанд.
Иқтидори истеҳсолии корхона дар як сол 60 ҳазор тонна арматур ва ноқил буда, сифати маҳсулот дар асоси таҳлили мутахассисон ба стандартҳои байналмилалӣ ҷавобгӯ мебошад.
Ашёи хом ба корхона қисман аз дохили ҷумҳурӣ ва хокаи кимиёвии он бошад, аз Ҷумҳурии Қазоқистон дастрас шуда, дуди ғализи он бо истифода аз дастгоҳҳои махсус коркард ва безарар гардонда мешавад.
Пешвои миллат муҳтарам Эмомалӣ Раҳмон ба сифати корҳои анҷомёфта баҳои баланд дода, дар самти амалишавии ҳадафи чоруми миллӣ- саноатикунонии босуръати мамлакат, истеҳсоли маҳсулоти ивазкунандаи воридот, ҷалби сармоя, бунёди корхонаҳои муосири саноатӣ ва таъсиси ҷойҳои нави корӣ ба роҳбарият ва масъулон дастуру ҳидоятҳо доданд.
Тавре иттилоъ дода шуд, барои бо сифати хуб истеҳсол шудани маҳсулоти корхона дастгоҳу технологияи муосир дар доираи ҳамкорӣ аз Ҷумҳурии Мардумии Чин дастрас ва васлу насб гардидааст, маҳсулоти ниҳоӣ арматур ва ноқил пас аз коркарди оҳанпора, истифодаи моддаи кимиёвӣ ва об кардан омода ва банду баст карда мешавад.
Дар саҳни корхонаи «Оҳангудозии Тоҷикистон» ба Пешвои миллат муҳтарам Эмомалӣ Раҳмон маҳсулоти саноатии ноҳия муаррифӣ гардид.
Маврид ба таъкид аст, ки дар ноҳияи Рӯдакӣ дар доираи иқдомҳои созанда ба истиқболи ҷашни бузурги миллӣ – 30-солагии Истиқлолияти давлатӣ бо дастгирӣ ва таваҷҷуҳи бевоситаи роҳбарияти олии давлат ва Ҳукумати Ҷумҳурии Тоҷикистон, саҳми соҳибкорони ватандӯст ва ҷалби сармояи хориҷӣ 13 корхона бо таъсиси 300 ҷои корӣ бунёд гардид, ки ин раванд ба боз ҳам беҳтар шудани сатҳи зиндагии аҳолӣ заминаи мусоид гузошт.
Татбиқи бомароми барномаҳои давлатӣ ва бунёду барқарорсозии корхонаҳои истеҳсолӣ имконият фароҳам сохт, ки ҳаҷми истеҳсоли маҳсулоти саноатӣ дар ноҳия зиёд ва сатҳи иқтисодию иҷтимоии ноҳия сол то сол беҳтару хубтар гардад.
Дар 8 моҳи соли ҷорӣ ҳаҷми истеҳсоли маҳсулоти саноатӣ 243 миллиону 300 ҳазор сомониро ташкил дод. Ин нишондод нисбат ба ҳамин давраи соли гузашта 46,3 фоиз зиёд мебошад.
Айни ҳол дар ноҳияи Рӯдакӣ 127 корхонаи хурду бузурги истеҳсолӣ фаъолияти пурсамар дошта, бо дарназардошти афзоиши талабот ҳаҷми истеҳсол ва номгуи маҳсулот марҳила ба марҳила зиёд карда мешавад.


САРВАРИ ДАВЛАТ ЭМОМАЛӢ РАҲМОН АЗ НАМОИШИ КИШОВАРЗӢ ВА ГАРМХОНАИ ХОҶАГИИ ДЕҲҚОНИИ «ИСМАТУЛЛО» ДАР НОҲИЯИ РӮДАКӢ ДИДАН НАМУДАНД
25 сентябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Рӯдакӣ ҳамчунин аз намоиши дастовардҳои кишоварзони ноҳия ва гармхонаи Хоҷагии деҳқонии «Исматулло» дар деҳаи Кӯктоши Деҳоти Чоргултеппа дидан намуданд.
Аҳли заҳмати ноҳияи Рӯдакӣ наздики 30 навъи маҳсулоти гуногуни кишоварзиро, ки ҳамасола дар заминҳои зархези ин ноҳия бо истифода аз имконоту шароити мавҷуда бо усули замонавӣ парвариш карда мешавад, ба намоиш гузоштанд.
Тавре таъкид гардид, ки дар ноҳияи Рӯдакӣ 5031 хоҷагии деҳқонӣ фаъолият дорад, ки ҳамасола бо истифодаи пурсамари ҳар як қитъа замин ва тухмиҳои серҳосили зироат, дар асоси маслиҳати мутахассисони соҳа маҳсулоти фаровон ба даст меоранд.
Дар намоишгоҳ намунаҳо аз маҳсулоти кишоварзӣ, аз ҷумла картошка, пиёз, сабзӣ, карам, гулкарам, боимҷон, булғорӣ, лаблабуи сурх, турб, шалғам, каду, бодиринг, помидор, себ, нок, шафтолу, ангур, тарбузу харбуза ва ғайраро ба маъраз гузоштанд.
Пешниҳоди анвои гуногуни ангур дар ду пирамида ва тарбузу харбуза бо шакли хос дар намоишгоҳ хеле ҷолибу диданӣ буд.
Кишоварзони ин ноҳияи аграрии мамлакат соли равон дар кишти баҳорӣ дар майдони 4 ҳазору 371 гектар ғалладонагӣ, 3 ҳазору 31 гектар зироати техникӣ, 675 гектар картоша, 853 гектар сабзавот, 52 гектар полезӣ ва дар маҷмӯъ дар 10 ҳазор гектар анвои гуногуни зироат кишт намудаанд ва ба маблағи 379 миллиону 433 ҳазор сомонӣ маҳсулот истеҳсол кардаанд.
Ба Сарвари давлат муҳтарам Эмомалӣ Раҳмон аснои боздид аз намоиши маҳсулоти кишоварзӣ иттилоъ дода шуд, ки ба боғу токпарварӣ низ дар ноҳияи Рӯдакӣ таваҷҷуҳи хоса дода мешавад ва аҳли заҳмат ҳамасола бо афзун намудани масоҳати боғот ҳаҷми истеҳсоли меваҳои шаҳдбори ватаниро зиёд мекунанд.
Дар хоҷагиҳои ҷамъиятӣ ва деҳқонии ноҳияи Рӯдакӣ соли равон 38,3 гектар боғи нави дарахтони тухмдору донакдор ва 2,5 гектар токзори нав бунёд карда шудааст, ки нисбат ба соли гузашта 4 гектар зиёд мебошад.
Дар ноҳияи Рӯдакӣ ба рушди соҳаи занбӯрпарварӣ низ таваҷҷуҳ зиёд аст ва сол то сол бо афзун намудани шумораи оилаҳои занбӯр ҳаҷми истеҳсоли асали табиӣ афзун мегардад.
Зимни боздиди Сарвари давлат аз гӯшаи дастранҷи занбӯрпарварон таъкид гардид, ки феълан шумораи оилаҳои занбӯр дар ноҳия ба 2965 адад мерасад.
Занбӯрпарварони ноҳия соли равон 22 тонна асал ба даст овардаанд, ки нисбат ба соли гузашта зиёд мебошад.
Дар намоишгоҳ кормандони хоҷагии ҷангал низ намунаи гулу гиёҳҳои шифобахшро ба тамошо гузоштанд.
Пешвои миллат муҳтарам Эмомалӣ Раҳмон ҳангоми боздид барои ҳифзи олами бойю рангини табиати диёр ва ҷамъоварии бомавриди гиёҳҳои шифобахш ба масъулин дастуру маслиҳатҳои судманд доданд.
Барои коркард ва бастубанди гулу гиёҳҳои ватанӣ бунёди коргоҳҳои соҳавӣ дар ин ноҳияи калону сераҳолии мамлакат ба манфиат дониста шуд.
Дар намоишгоҳ парандапарварони ноҳия низ дастовардҳои худро ба маъраз гузоштанд.
Парандапарварони ноҳияи Рӯдакӣ сол то сол саршумори мурғро зиёд намуда, дар таъмини бозори дохилӣ бо гӯшту тухми босифати ватанӣ саҳми назаррас мегузоранд.
Таъкид гардид, ки феълан саршумори паранда дар ноҳия ба 236 ҳазор мерасад.
Президенти мамлакат муҳтарам Эмомалӣ Раҳмон зимни суҳбат бо парандапарварон ҷиҳати боз ҳам афзун намудани саршумори мурғ ва боло бурдани ҳаҷми истеҳсоли гӯшту тухм маслиҳатҳои судманд доданд.
Кишоварзони ноҳияи Рӯдакӣ дар таъсиси гармхонаҳои доимоамалкунанда низ таҷрибаи ғанӣ дошта, барои таъмини фаровонии бозори истеъмолӣ дар ҳама фаслҳои сол аз имконоти мавҷуда пурсамар истифода мебаранд.
Ҳангоми боздиди Президенти мамлакат муҳтарам Эмомалӣ Раҳмон аз гармхонаи Хоҷагии деҳқонии «Исматулло», ки феълан дар он парвариши бодиринг бо усули замонавӣ ба роҳ монда шудааст, иттилоъ доданд, ки масоҳати гармхонаҳои доимоамалкунанда дар ноҳияи Рӯдакӣ дар маҷмӯъ 20 гектарро ташкил медиҳад.
Хоҷагии деҳқонии «Исматулло» соли 2018 дар асоси дастуру ҳидоятҳои роҳбарияти олии мамлакат аз ҷониби соҳибкори ватанӣ Абдуманнаб Ҳусанов дар майдони 4 гектар таъсис ёфта, аҳли заҳмати он дар таъмини бозори дохилӣ бо маҳсулоти гуногун саҳми назаррас мегузоранд.
Дар хоҷагӣ бо истифода аз технологияи нав дар майдони 1 гектар барои парвариши сабзавоти гуногун, аз ҷумла бодирингу помидор гармхона ташкил гардидааст, ки дар он 10 нафар бо ҷойи кори доимӣ ва маоши хуб мебошанд.
Мақсади асосии хоҷагидорон дар ҳамаи фаслҳои сол бо сабзавоти тару тоза таъмин кардани аҳолии пойтахти мамлакат – шаҳри Душанбе мебошад.
Соли равон дар гармхона дар ду мавсим 25 ҳазор ниҳоли помидор ва наздики 27 ҳазор ниҳоли бодиринг шинонида шуда, дар мавсими аввал аз майдони 1 гектар гармхона 74 тонна помидор истеҳсол ва аз ин ҳисоб 407 ҳазор сомонӣ даромад ба даст омадааст.
Хоҷагидорон дар мавсими дуюм аз парвариши бодиринг то имрӯз зиёда аз 80 тонна маҳсулот гирифтаанд ва умед доранд, ки боз дар ҳамин ҳаҷм маҳсулот ҷамъоварӣ ва пешниҳоди бозори истеъмолӣ намоянд.
Нигоҳубин ва парвариши бодиринг дар хоҷагӣ бо усули замонавӣ ба роҳ монда шуда, хоҷагидорон барои обдиҳии зироат аз усули қатрагӣ кор мегиранд.
Барои гарм кардани гармхона аз ангишт истифода бурда мешавад ва талабот дар як сол ба ин намуди сӯзишворӣ дар хоҷагӣ 300-350 тоннаро ташкил медиҳад.
Ба гуфти хоҷагидорон истифодаи технологияи муосир дар гармхона омили муҳими боло бурдани ҳаҷми истеҳсоли маҳсулот мебошад.
Ҳаводиҳӣ ва ҳавотозакунии дохилӣ гармхона ба таври автоматӣ ба роҳ монда шудааст.
Сарвари давлат муҳтарам Эмомалӣ Раҳмон зимни шиносоӣ бо рафти ҳосилбандии ниҳолони бодиринг дар ин гармхона таҷрибаи кишоварзони ноҳияи Рӯдакиро дар самти ташкили гармхонаҳо намунаи ибрат арзёбӣ намуда, барои зиёд кардани масоҳати гармхонаҳои доимоамалкунанда ва ба ин васила таъмини фаровонии бозори дохилӣ дар дигар шаҳру ноҳияҳои мамлакат ба масъулин дастуру ҳидоятҳои судманд доданд.


ПЕШВОИ МИЛЛАТ ЭМОМАЛӢ РАҲМОН НИШОНИ ДАВЛАТӢ ВА ПАРЧАМИ МИЛЛИРО ДАР НОҲИЯИ РӮДАКӢ ИФТИТОҲ НАМУДАНД
Дар доираи сафари корӣ дар ноҳияи Рӯдакӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вазъияти тантанавӣ Парчами миллӣ ва Нишони давлатии Ҷумҳурии Тоҷикистонро дар маркази ноҳия ифтитоҳ намуданд.
Парчами давлатии Ҷумҳурии Тоҷикистон дар шаҳраки Сомониён дар пояи баландии 45 метр қомат афрохта, паҳноии матои он 7 метр ва дарозиаш 14 метрро ташкил медиҳад.
Баландии пояи Нишони давлатӣ, ки дар шафати Парчам сохта шудааст, 22 метр мебошад.
Дар баробари сохтмони Парчам ва Нишони давлатии Ҷумҳурии Тоҷикистон дар атрофи ин ду муқаддасоти миллӣ гулу буттаҳои ороишӣ шинонида шудааст. Атрофи иншоот чароғон ва ободу зебо карда шуда, фаввораҳо низ сохта шудааст, ки аз ин пас ҷойи сайру гашти сокинон ва меҳмонони ноҳия мешавад.
Бунёди рамзҳои давлатӣ дар доираи дастуру ҳидоятҳои созандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба хотири гиромидошти муқаддасоти миллӣ сурат гирифтааст.
Лоиҳаи Парчами миллӣ ва Нишони давлатии Ҷумҳурии Тоҷикистон аз ҷониби Ҷамъияти дорои масулияти маҳдуди «Тоҷмаҳал-2010» таҳия гардидааст.
Президенти мамлакат муҳтарам Эмомалӣ Раҳмон ба иҷрои корҳои сохтмонӣ баҳои баланд дода, барои боз ҳам ободу зебо намудани атрофи иншооти мазкур ба масъулон дастуру ҳидоят доданд.
Дар доираи иқдомҳои созанда ба истиқболи 30-солагии Истиқлолияти давлатии Ҷумҳурии Тоҷикистон дар ҳама гӯшаву канори мамлакат корҳои созандагию бунёдкорӣ идома дорад. Бунёди парчаму нишони давлатии Ҷумҳурии Тоҷикистон дар маркази ноҳия ва ба макони сайру гашти сокинон тадбил ёфтани ин мавзеъ туҳфаи арзишманд ба сокинони ноҳия ба истиқболи ҷашни умумимиллӣ маҳсуб меёбад.
/АМИТ «Ховар»/.

рейтинг: 
Оставить комментарий
  • Шарҳҳо
  • Имрӯз
  • Серхондатарин